Vo a kontarvos un pokitiko de la afamada meaná "El rakí mazaloso", sitiado en Villa Crespo kuartier de Buenos Ayres, afamado por la kantidá de djidiós ke ayegaron a morar en el, aynda en el dya de oy. 

Desde lejos, pudía verse el grande kartel kolor maví, amariyo i vedre ke resaltava aynda más en las notches por el briyo de las luses, me kauvsa risa kada ves ke lo nomvro i mas agora ke so aedada, komprendo lo ke kere dizir el vierbo mazaloso.

Mosotros morávamos serka de la meaná, enmientras djugábamos a la rayuela en la kaleja, veíamos desde la maniana matrana a los omvres asentados en las mesas tomando kafé , fumando un sigarret, meldando el jurnal, djugando a las barajas i biyar , keshandose komo buenos ardjentinos, de los temas de la aktualidá : del governo, politiká, lavoros, las parás ke no alkanzan para vivir i más. 

La meaná tinya enriva de kada mesa, percheros de madera, ande enkolgavan los chapeos mujeres i omvres, moda de akeyos tiempos. Ama esa maniana de invierno azía unos fríos de entesarse, las djentes kaminaban por la kalejas abrigados kon paltós, pardesius, guantes, chapeos i bufandas en derredor del garón por modo de no kaer hazino de garón i bronsht.

Las ventanas, se moshavan kon la vapor ke etchava la makiná del kafé, algunos tomavan kafé a la turka ( siempre pronto en las yirvés), kuando entraban pedían pishín un kafisiko por lo busaná del día, ansina se yenavan de musafires las mesas.

Ama, esa maniana abía una kalor espesial en la meaná, el unikó tema ke se avlava era, de las ermanas bailarinas a la turka : Violeta i Alegre Aljadef vinidas de Rodhas, notche de aljád de la semanada anterior abían bailado en el kafé Izmir, alavaban a Isakito Telias del modo ke bailó, enmientras las dos se meneaban bueno en derredor de el, i el modo ke meneaban el bel de un lado a otro kitando lokas a las djentes. 

El patrón de la meaná Liachón Baena, iba sintiendo esto kon mas atansión de lo ke podesh imaginar, sikileado por este etcho, empasando los días metió tino de yamar mas musafires a su meaná, dunke en vedrá la situasión ekonomiká de la Ardjentina no era kolay para etchos muevos.

Tiempos ke para yamar por telefón al eksterior, era menester ir al sentro de la sivdá i pedir ora kon antisipasión, las letras i las telegramas tardavan días en yegar arogando kon la ayuda del Dió, ke las líneas no se charpeen. 

Su penserio dió munchas vueltas, asta ke le vino al meoio la idea de fraguar una akademia de baile a la turka, para ambezar a las djentes interesadas en este buto, pensó en su Izmir kerido ande abía nasido i engrandesido, fue al Korreo i envió una telegrama a su primo Leon Alculumbre, para ke lo akonseje i envíe una bailarina, deshando tiempo suficiente para ke pense en ken i ken.

A la semana a poko de abrir la meaná, ajarvó la puerta el mansevo del korreo kon una telegrama, era la kontestasión a la demanda de una profesora de baile a la turka, se asentó mirikioso a meldar, ¡ alegría grande!, su primo le emviaba a la profesora madam Esterula Jazán ,!... terminó de meldar, tomó papel, la pendola i pishín arespondió una letra a la bailarina, para akodrar i aparejar su vinida .

La profesora, se etchó a la mar kon su baúl desde Rodhas a Marsella, i ayí asuvió a la vapor Pampa asta el porto de Buenos Ayres 

El meoio de Liachón Baena no kedava kedo ni un solo minuto, del modo de fraguar la akademia, akodro una sita kon el l arkitekto Rodolfo Jana, afamado djidió del kuartier, aparejó los planos i se los apresentó a Baena , pishín los konsentió i ampezó a fraguar la akademia enriva de la meaná, serrada por más de 4 meses por este etcho.

Kalía ver la kalidá de los espejos biselados, alfomvras, cheslones, siyas i más , merkados en los mijores magazines de la sivdá. El aparato grande de madera para pasar la musiká , abía ke tener kudiado kon los diskos de pasta preta, de no romperlos, ¡ eran trushido de la Turkía!, ...día a día iba tomando kolor de akademia, la eskalera de madera briyosa, los pisos de marmolés de Carrara blankos, i asta tomó una sekretaria djoven de kaveyos pretos kon bukles, lusia, de buen puerpo i kara de risa, mui benadam para aresivir a los interesados en el baile a la turka, asentada al lado del narguilé de Izmir trushido por Baena.

Kuando todo estuvo pronto para la inagurasión, enriva del kartel "El rakí mazaloso" , enkolgaron: AKADEMIA DE BAILE A LA TURKA kon lumbres blankas komo el yasmin. 

¡Kalya ver a los pelukers i manikurs del kuartier atakanando a las mujeres para la notche, afilú merkando en la perfumería Cydon de la avinida Corrientes boyás para los mushos i karas i asta perfumes de la Fransia, los omvres kortando los kaveyos para peinarlos kon gomina Brancato agora yamado gel i arapándose barbas i bigotes. La kaza de banyos de la kaleja Padilla i Malabia no tenía más sitio de la mabulaná de djentes ke en abía.

En vedrá el kuartier entero se alevantó ese dya, mientres en la meaná aprontavan todo para aresivir a los komvidados, no mankavan los guevos jaminados, keso turko, pitas, boios de aselga , borrekitas de jandrayo, pipinos i kuchundurias en trushí, salado , reyas , rakí , fistokis, piniones, mueses, almendras, mogadós de susam, yamalí kon mueses enriva i ...asta baklavá etcha por Perlá la Sazbona de bendichas manos

Kuando se izo la ora, avagar, avagar ampezaron a ayegar las djentes, mientres asuvían la eskalera , demudados kedavan de ver todo lo bueno ke abía. 

Liachón Baena entresalido i kontente estaba por este etcho, atakanado kon traje kolor blú kuzido por el shastre Nisim Israel djidió de Izmir, chismés pretas merkadas en la chapinería de Alberto Cuneo, grevata kon rayas de seda natural a la franka. Miró a todos sakando biervos emoviantes de su boka, izo una sinial i ampezó a sintirse la musiká, a lo ke la profesora Esterula Jazan ampezó a bailar kon los kumbidados. 

. Kuando abasharon a komer i bever, las djentes se apuntavan para ambezarse del baile a la turka. Las klases ampezaron ese djueves por la tadre, iban mirikiosos de lo ke iba a akonteser, emprimero yamó a las mujeres, las paró frente al gran espejo i disho: el puerpo debe menearse bueno desde el bel para abasho i las patchás al kompás de la musiká enmientras las manos deven menearlas komo dos palombas envolando lo izieron, se asentaron deshando el sitio a los omvres, se pusieron uno detrás del otro, miró al otro espejo, tokó la musiká i la profesora los deshó bailar etchando el ojo, paró la musiká i disho: el puerpo i los brasos atrás de las musheres,... enmientras eyas se menean, vosotros también i el paniuelo envolando enriva de la kaveza , kon la pachá siestra pasar delantre de eya dando vueltas en derredor i dublando el bel de a poko a poko.

Las djentes salían kontentes de las klases, diziendo ke era una mujer alavada i benadam, al anyo enviniente afilú bailó en la meaná grega Skorpios en la avinida Santa Fe i Montevideo.

Avoltando a la akademia fraguada komo lo bueno del mundo, kedó munchos anios en pié ambezando i embelekando a las djentes, ama lo ke akontesió me trae nostaljía.

Kuando Liachón Vaena se fue de este mundo, la ija i el yerno no kisieron kontinuar, kedó anios serrada asta 1980, en ke derrokaron sus paredes para fraguar un edifisio de munchos pisos, la meaná i la akademia pasó a ser un ermoso rekodro nostaljiko del kuartier, de las djentes ke gozaron de ella.

Lo mesmo akontesió kon la meaná grega, la derrokaron para fraguar magazines i una galería. Oy kise partajar kon vosotros el rekodro de la meaná i la akademia de baile a la turka, dunke kon nostaljía, siguen vivas en el meoio i el korazón .

 

Graciela Tevah de Ryba julio 2009